Бидний хувьд 2011 оны хамгийн чухал онцлог бол ДЭИН-ийг эх орондоо амжилттай хэрэгжүүлсэн явдал билээ. Дэлхийн Энхийн Их Наадам нь олон нийтэд үйлчилж, эх орон, даян дэлхийн асуудлыг олон улсын хэмжээнд хэлэлцэж, олж авсан, бүтээж босгосон энхтайвнаараа бахархан баярлах боломжийг Монголчуудад олгон ард нийтийг зүрх сэтгэлээр нь нэгтгэж чадсан томоохон арга хэмжээ болж чадсан юм.
2011 онд Дэлхийн Энхийн Их Наадмын хүрээнд хамтдаа хэрэгжүүлсэн дараах хөтөлбөрүүдийг өдөрлөгийн үеэр онцлон танилцууллаа. Үүнд:
Наадмын хүрээнд 25 улсын 130 орчим төлөөлөл оролцсон Олон улсын удирдагчдын бага хурал Төрийн ордонд хоёр өдөр амжилттай хуралдаж, Зүүн хойд Азийн бүс нутгийн энхтайванд баримтлах чиг шугам болон Монгол Улсын оролцоог тодорхойлон хэлэлцэж, “Улаанбаатарын тунхаглал” гаргасан.
2011 онд Монголд болсон “Хүн гүрнээс гаралтай ард түмнүүдийн энхийн их наадам”-ын хүрээнд нийгэмд үйлчлэх 10 хөтөлбөр хэрэгжиж, үр дүнгээ олон нийтэд танилцуулсан бөгөөд тэдгээрээс 3 төслийг манай Энхийн төлөө үйлчлэхүй ТББ удирдан зохион байгуулсан билээ.
Нийгэмд тулгамдсан асуудлуудыг хамтын хүчээр шийдэх зорилготой “10 төгрөгийн хүч” аян “Ганц мод гал болдоггүйтэй адил 10 төгрөг ганцаараа үнэ цэнэ багатай ч, олуулаа нэгдэж чадвал хүч, итгэл, ирээдүйг бүтээж, амьдрал өөрчлөх идтэйг монголчууддаа харуулсан.
“Бид хөгжлийн эзэд” хөтөлбөрөөр аймаг сумандаа үлгэр жишээ болсон тэргүүн туршлагуудыг судлан бүртгэж, өөс хөгжлийн загвар болохуйц шилдгийн шилдэг 40 төсөл санаачилгыг олон нийтэд зарласан.
Дэлхийн 10 гаруй орны оюутан залуус “Соёлын солилцооны хөтөлбөр”-т хамрагдаж, монголчуудын өв соёл, ёс заншилтай танилцаж, манай залуустай ойртон нөхөрлөсөн юм. Соёлын солилцооны хөтөлбөрт хүрэлцэн ирж оролцсон залуус Чингэлтэй дүүрэг дэх Үндэсний цэцэрлэгт хүрээлэнд 2220 мод тарисан бөгөөд Хүн гүрний түүхэн ойн жилийг тохиолдуулан энэ ажлыг зохион байгуулсан.
“Бүтээсэн энх тайвнаа бүгдээрээ тэмдэглэе” уриатай наадамд 100.000 гаруй хүн оролцсон.
Эдгээрээс гадна байгууллага тус бүрийн болон хамтран хэрэгжүүлсэн олон сайхан үйл ажиллагаа, хөтөлбөрүүд буйг үзэсгэлэнгээс үзэж сонирхсон. Бидний хамтдаа бүтээсэн 2011 оныг ийнхүү эргэн тольдоход ирж буй шинэ ондоо илүү ихийг хийж бүтээх хүсэл сэтгэлээр жигүүрлэсэн тэмүүлэл, эрч хүч мэдрэгдэж байлаа.
“Хамтдаа бүтээсэн 2011 он” өдөрлөг нь “Дэлхийн Энхийн Их Наадам, Монголд” үйл ажиллагааны баримтат кино, илтгэл, оны тайлан, найрал дуу, урлагийн тоглолт гээд олон сайхан хөтөлбөрийг агуулсан байлаа.
Тулгамдсан асуудлаа хамтын хүчээр шийдэх зорилготой “10 төгрөгийн хүч” аян нь бид зүрх сэтгэлээрээ нэгдэж чадвал хамгийн бага мөнгөн дэвсгэртээр хамгийн том үйл бүтээж болдгийг нийгэмд мэдрүүлсэн. 25 мянган хүн нэгдсэн энэхүү аянаас цугласан мөнгийг “Нарны хүүхдүүд” асрамжийн төвд хандивласан. Энэ төвийн дэргэдэх ардын урлагийн хамтлагийн авъяаслаг хүүхдүүд гадны хэд хэдэн оронд эх орныхоо нэрийг дуурсгасан тухай сонсоод бахархаж байлаа. Харин энэхүү өдөрлөгт хүрэлцэн ирсэн бидэнд тэдний гэрэл гэгээтэй хөөрхөн дүр төрх, өөдрөг тэмүүлэлтэй авъяаслаг бүжгийг үзэх боломж олдсон юм. Хамдтаа бүтээсэн 2011 он өдөрлөгт “Нарны хүүхдүүд” асрамжийн төвийн дүү нар маань өнгө гэрэл нэмж, үзэгчдийн сэтгэлийг хөдөлгөн өөрсдийн хэн болохоо гэрэл гэгээтэй жавхаатай бүжгээрээ тодотгосон юм.
Ингээд өдөрлөгийн үйл ажиллагаа Халуун элгэн нутаг дууг хүндэт оролцогчид, үзэгчид, танхим дүүрэн цугласан монгол түмэнтэй хамтран дуулснаар өндөрлөв.
