Өнөөгийн нийгэмд хайр энэрэл, халамж анхаарлаар дутаж яваа азай буурлуудаа хүндэтгэн тэдэндээ бага ч болов сэтгэлийн урам хайрлаж амьдрахуйн хүч өгөх зорилгоор Олон Улсын Боловсролын сангийн дэргэдэх “Гэрэлт цамхаг” оюутны ёс зүйн клубын оюутнууд өөрсдийн санаачлагаар “Сэтгэлийн хадаг” сайн дурын нийгэмд үйлчлэх үйл ажиллагааг 2006 оноос хойш жил бүр Сар шинийн баярыг тохиолдуулан зохион байгуулсаар ирсэн аж. Энэ жилийн хувьд ч уламжлал ёсоор цагаан сарыг угтан үйл ажиллагаагаа хийхээр оюутан залуус маань шамдан ажиллаж байна. Тэд “Энхийн төлөө үйлчлэхүй” ТББ “Оюуны эрэл” оюутны холбооны зүгээс улирал бүр зохион явуулдаг “Service Party Day” сайн дурын төслийн хүрээнд “Шинэ оноо сайн үйлсээр угтацгаая” уриан дор “Сэтгэлийн хадаг 2012” тусч өдөрлөгийг 2012.02.11-ний өдөр хамтран зохион явуулахаар бэлтгэж байна. Улааанбаатар хот доторх 6 дүүрэг болох Баянгол, Баянзүрх, Сүхбаатар Сонгинохайрхан, Чингэлтэй, Хан- Уул дүүрэг тус бүрээс амжиргааны баталгаажих түвшингээс доогуур орлоготой, нэн ядуу амьдралтай болон хөгжлийн бэрхшээлтэй 25 өрх буюу нийт 150 өндөр настан өрхийг сонгох юм. Энэхүү үйл ажиллагааны хүрээнд ахмад настнуудынхаа гэр бүлд очиж туслахын зэрэгцээ хүлээн авалт зохион байгуулна. Мөн гарын бэлэг гардуулах, урлагийн тоглолт үзүүлэх, хүндэтгэлийн зоог барих, хамтдаа хөгжөөнт тоглоом тоглон сэтгэлийн үгээ хуваалцах зэргээр ахмад настнуудаа баярлуулах юм. Тус төслийн хүрээнд оюутан залуус өөрсдийн сурсан мэдсэн зүйлээ амьдралд бодитоор хэрэгжүүлж, бусдыг хайрлах бусдын зовлонг ойлгон хуваалцах соёлд суралцана. Энэхүү зорилготой нэгдэн бидэнтэй хамтран ажиллах сонирхолтой албан байгууллага хувь хүмүүсийг бид уриалгахнаар угтан, баяртайгаар хамтрах болно. Бусдын тусын тулд хийж буй сайн санааны үйлс бүхэн мянгантаа дэлгэрэх болтугай.
